烏克蘭角色嘅轉變 深值粵獨去探研


前南斯拉夫係一個唔錯嘅樣板，尤其係科索沃係點樣爭取到國際社會關注，最關鍵嘅係點樣爭取到北約嘅軍事介入，有咗北約嘅軍事隔離做靠山，建立有事實管治範圍嘅事實政府，到建立有事實疆域嘅事實國家，就變得水到渠成。個中呢一系列進程嘅具體運作係點，尤其值得我哋粵人去探究。

而前南斯拉夫係縮細咗嘅前蘇聯，塞爾維亞相對於其他六國（包括科索沃），佢並唔算大，六對一好容易會贏。相反，東帝汶之於印尼，就係一蚊對一牛，東帝汶嘅獨立進程，同樣有國際社會嘅關注，同樣有聯合國維和部隊嘅軍事介入，尤其係澳洲嘅力撐。東帝汶嘅案例，係喺國際社會聲援並且作出實質嘅軍事介入底下，一個以弱勝強最後成功立國嘅絕佳範例。個中運作更加具有參研性。

近呢二三十年，其他冇國際社會作出實質軍事介入，而靠自己嘅能力獲得獨立嘅，影響最深遠嘅，莫過於前蘇聯嘅解體，借助八十年代末民主潮獲得獨立嘅，仲有非洲嘅兩個國家，納米比亞同厄立特里亞。

八十年代末民主潮，對俄國影響深遠，呢種影響，就有如二戰對德國嘅影響一樣，使佢冇咗好大一部分有絕佳價值嘅殖民領地。俄國領土雖然巨大無比，不過核心區域不過係伏爾加河中上遊流域加烏拉爾山脈中段一帶，唔係好大啫。

前蘇聯解體，俄國要以一敵十四，最重要嘅，係裡頭有烏克蘭呢隻重磅股反佢，前蘇聯亦都終於散。前蘇聯解體嘅最大推動力係烏克蘭而唔係最先反水嘅波羅的海三國，戈巴卓夫當其時就打算踢開波羅的海三國，畀佢哋獨立而打算拉攏烏白哈，以求保全蘇聯嘅命脈，祇係烏克蘭眼見復國機遇千載難逢，稍瞬即逝，要執意獨立，烏克蘭重磅股一發威，中亞南高加索諸國於是紛紛仿效，直到1991年12月，連最唔想獨立嘅另一個重磅大國哈薩克都走埋，俄國佬先至好無奈噉宣布前蘇聯玩完。

可以講，當其時嘅烏克蘭總統克拉夫丘克係當之無愧嘅烏克蘭民族英雄！佢揸著咗烏克蘭千載難逢稍瞬即逝嘅復國機遇，執意獨立，終於成就咗烏克蘭民族幾百年嚟要擺脫俄羅斯掌控獨立建國嘅夢想！假如烏克蘭當時稍作遲疑，畀戈巴卓夫嘅新聯盟條約坤到，以俄國嘅強力潛能，一旦畀佢會順條氣，烏克蘭恐怕再等一千年都未必有機會成功獨立建國，烏克蘭冇辦法獨立，就祇有生生世世做俄羅斯治下嘅小俄羅斯人，而唔係做屬於歐洲嘅烏克蘭人喇。

其實研究前蘇聯解體，最值得探究嘅就係烏克蘭角色嘅轉變。十至十二世紀嘅基輔羅斯古國，歷史地域同血緣上都係屬於烏克蘭而唔係俄羅斯嘅，烏克蘭嘅立國要遠早於俄羅斯。基輔羅斯嘅曾經存在，奠定咗烏克蘭人嘅故國情意結，古基輔羅斯之於烏克蘭就好似古南越帝國之於我哋大粵噉，係一個源自遠古時光嘅光輝回憶。

古基輔羅斯喺十三世紀亡於蒙古西征，之後四百年間，先後接受蒙古波蘭立陶宛嘅管治，今日西烏克蘭信奉羅馬天主教，就係受波蘭嘅影響所致。1654年，絕對稱得上係烏克蘭嘅黑暗紀元，因為嗰年俄國佬聲稱要同佢哋嘅“東斯拉夫兄弟：俄羅斯眼裡頭嘅小俄羅斯（佢哋就自命做大俄羅斯）”---烏克蘭“永久合併”。假如話，喺波蘭同立陶宛嘅治下，烏克蘭仲可以叫做烏克蘭，烏克蘭人仲可以叫做烏克蘭人，噉喺俄國打著“東斯拉夫兄弟”招牌，赤裸裸嘅殖民同化之下，烏克蘭一夜之間畀人矮化做“小俄羅斯”，烏克蘭人一夜之間畀人矮化做“小俄羅斯人”。喺俄國同俄羅斯人眼裡頭，烏克蘭人甚至冇被承認係一個獨立嘅民族，而僅僅係被視為俄羅斯人裡頭嘅一個邊鄙之地嘅二等分支。

呢樣嘢，我哋粵民族嘅遭遇同烏克蘭人係幾咁相似！我哋大粵喺支那嘅角色，順帶聯想下烏克蘭喺前蘇聯嘅角色，就會知道我哋而家係咩處境，往後有機會嘅我哋應該點樣果決噉去揀！期待我哋大粵嘅克拉夫丘克！