論“卓越”社會嘅達至



仲有，家陣唔係喺之乎者也嘅古老十萬世之前，記著！我哋係現代嘅粵族人！嗰啲化咗灰好耐嘅漢族人嘅酸縮嘢咪立亂揚出嚟喇！細佬！

“民主目的係平等 夫平等者 尊卑不分 三教九流皆有政治權力 此非卓越之阻碍乎”

我絕對唔認同妳呢種諗法！

“政府何以要由草民大眾 選舉産生 其不是因為驚政府做壞事乎此非懷疑乎 政府不是成為被管之牛乎”

我絕對唔認同妳呢種諗法！

“原罪論 不就是基督教義”

原罪論好似係猶太教嘅教義啵。

“看看台灣人跟尾做狗過聖誔幾虛憾 就是因為精神分裂的政體 導致他們狗眼看人低 自高自大”

唔通妳覺得臺民族拋棄“中華民國”嘅行為，係對主導創建“中華民國”嘅粵族人嘅一種敵意嘅侮辱？若果妳真係噉諗（其實好多粵族人都有類似嘅情感），我可以肯定噉話妳知：妳同妳嘅“中國”情意結仲未徹底了斷！妳嘅粵民族意識，粵本土思維仲未徹底覺醒！簡單啲講，妳嘅心髓仲未夠粵獨！


都幾經典嘅論述，等我嚟將呢段嘢嘅脈絡再理順啲：

民主嘅政制----->>>行之有效噉限制政府過份膨脹嘅權力----->>>使到個人有充分自由----->>>個人嘅自身才能得以充分並唔受限制噉施展（達至個人“卓越”）----->>>造就社會嘅多元聲音同多元才智（呢樣嘢嘅意義類似於自然界嘅生物多樣性，通俗啲講就係百家爭鳴，百花齊放）----->>>文化繁榮同科學昌盛嘅根基得以奠定----->>>推動社會全面進步（社科類同自然科學類齊頭並進，達至一個“卓越”社會嘅實現）

上邊列舉嘅，係一個好理想化嘅民主“卓越”社會進化模型，由民主政制到最終嘅“卓越”社會，起碼要歷經六個步驟（或者六重關卡）。呢個過程裡頭，喺任何一個環節出現偏差，噉最終出嚟嘅結果就有可能同模型裡頭所構建嘅完美願景有差距，甚至乎係180度嘅背道而馳。呢個亦都可以解釋，點解家陣行民主政制嘅國家，仲會有咁多諸如：政局動蕩，貪污腐敗，疫疾饑荒，貧窮，內戰等等不如人意嘅事幹出嚟。

大凡一樣嘢，佢嘅內部構造越精密越複雜，噉隨之而嚟嘅，就係佢嘅可靠性，耐重復性越低。舉例講，一臺結構簡單嘅機器，出故障嘅幾率肯定要低過精密複雜嘅機器。精密複雜嘅機器既然咁煩，點解我哋仲要追求佢呢？咪皆因呢樣咁精致嘅寶貝可以為我哋創造更多更有意義嘅價值囉！由民主政制到“卓越”社會全面實現嘅路途雖然坎坷漫長，不過仍然值得我哋堅決去行！

喺度不妨再模擬一下極權政制嘅社會進化模型，有意思嘅係，佢同樣可以締造“卓越”：

極權獨裁政制----->>>政府嘅權力無所不在（對此有人大家褒賞，謂之自上而下，如臂使指）----->>>個人嘅自由空間近乎係零（相對嘅，“集體”嘅作用大增，“團結就是力量”，達至“人民大眾”嘅“卓越”）----->>>“專一”嘅社會輿論造就單調片面思維嘅蟻民潮----->>>創造同靈感嘅泉源全部乾涸，形成一個壓抑而死寂嘅社會

前蘇聯喺呢種模式下低運行咗將近七十年，喺個人嘅自由空間近乎係零嘅情況底下，佢依靠強而有力嘅“人民大眾式卓越”，的的確確締造出好多舉世矚目嘅成就，呢樣係事實嚟，唔可以視而不見，雖然呢種情況大大噉偏離咗某啲人心目中嘅“理想”狀態。不過噉又係咪代表上邊嘅模型唔OK呢？梗唔係喇，對比下共產中國同其他亞非拉次生代嘅社會主義國家就知喇。前蘇聯同某啲東歐國家喺某個環節上高處理得比較妥貼，所以佢哋嘅狀態就要比模型預期嘅好。

不過喺度要指出嘅係：呢種所謂嘅“人民大眾式卓越”，查實係建基喺個體個性泯滅嘅基礎上高嘅，“人民大眾”其實係一個好虛幻嘅概念，“人民大眾”所締造出嚟嘅“卓越”功勳往往會一級一級噉向上映照，由外圍嘅小衛星直到北平天安門城樓嘅“紅太陽”，從而人為噉鑄造咗一個神化嘅英雄，以萬眾嘅力量嚟成就一個人嘅“卓越”。

顯然，呢種英雄式嘅“卓越”，係極權政府嘅大官僚嘅個人專利，同民主政制之下所催生嘅眾生“卓越”，喺性質上同意義上都截然唔同。冇眾生嘅“卓越”，又何嚟社會嘅“卓越”？