呢個世界，冇人就唔會有社群、族群、國家，人權天賦，與生俱來，人權高過主權！


呢個世界，冇人就唔會有社群，冇人就唔會有族群，冇社群冇族群就唔會有所謂嘅民族國家。

所以，人權同民主係天賦嘅，與生俱來，喺人權同民主面前，冇任何前提。人權同民主高於一切，包括所謂嘅國家主權。

人權同民主係同人嘅生命權等量齊觀嘅，人冇生命權，等於軀殼死，人冇人權同民主，等於精神嘅湮滅，靈魂嘅淪喪！如同行屍走肉，係精神死。

有咗上邊嘅理解，有關民族自決權同所謂嘅國家主權邊個行先邊個行後，就好容易有結果：民族自決權首先係一班有共同認同感嘅一大群人嘅人權集合，係一種聚合式嘅人權形態嚟。天賦人權嘅同時，等同於上天一齊賦予咗一班有共同認同感嘅人群以民族自決權。

顯而易見，喺民族自決權面前，行使所謂嘅國家主權，係一個民族對另一個民族整體人權嘅粗暴侵犯。所謂嘅國家主權，不過係處喺統治地位民族嘅被無限放大咗國家化咗嘅民族自決權嚟咋！