對海外粵族人嘅一啲睇法



喺度先講下我對海外粵族人嘅一啲睇法，呢裡頭嘅觀點可能會對某啲粵胞粵僑有所得罪，海涵！

講真，其實海外嘅粵族人絕大部分都冇意識到自己真正嘅族屬，佢哋最多係關注到自己嘅先祖係嚟自邊度：嚟自廣東，佢就認為佢係廣東人，嚟自福建，佢就認為佢係福建人；而家廣東同福建歸屬緊邊個國家吖？中國！哦！噉佢哋就自然而然噉引申話自己係“中國”人！“中國”又叫做咩吖？哦！“華夏”！噉佢哋又去引申成“華夏”人，“華人”囉！

由於佢哋長年孤身在外，人單力薄，難免受異域人欺凌，再加上年歲漸長，思鄉日重，所以佢哋對“唐山”嘅感情與日俱增，呢啲點點滴滴都會使到佢哋嘅故土情結越嚟越強，並且喺海外狹窄嘅族群圈裡頭發酵漫延，代代相傳不絕！呢種故土情結，首先係臺山，順德，潮陽，梅縣嘅範疇；跟著就係四邑，廣府，潮州，客家嘅範疇，再上延啲就去到廣東嘅範疇，最後先係“中國”嘅範疇。喺呢個過程裡頭，佢哋嘅意識祇有地域嘅概念，而冇民族嘅概念，呢個就係咁多海外粵族人有臺山人，廣東人，乃至到“中國”人，“華人”，“華僑”，“華裔”認同嘅根本原因。

喺一個完全陌生，同故土完全隔絕嘅環境裡頭，佢哋一唔係就畀人同化（例如最早期移民菲律賓，泰國嘅廣東人，福建人），一唔係就唯有聚族而居，喺強大嘅外力脅迫底下，喺呢啲未被同化嘅海外粵族人裡頭，佢哋嘅廣東情結，“中國”情結，“華人”情結只會越嚟越大，呢樣嘢係好自然會發生嘅，呢個亦都係點解仲有咁多海外粵族人比起“中國”嘅粵族人仲要愛“中國”，仲要愛惜“中華傳統”嘅原因。

同樣嘅道理可以反推，點解喺“中國”嘅粵族人裡頭，經已有咁多人對“中國”，對“漢族”，對“華夏”開始持懷疑嘅態度呢？咪同樣係因為一個強大嘅外力脅迫囉！我哋粵右可以理解海外粵族人嘅“愛國”情懷！之但係，妳哋可唔可以理解下我哋呢啲喺“中國”嘅粵右呢種唔“愛國”嘅情懷呢？

當然，喺海外嘅粵族人裡頭亦都有右嘅元素，而且，呢啲海外嘅粵右經已為粵協增色不少！但係，呢度有啲“局促”嘅氣氛，同樣令唔少海外粵右嘅聲音只係雁過留聲而矣。

至於香港算唔算海外？九七之前或者仲算嘅，喺2008年嘅今日，香港真係越嚟越撈囉，某啲香港粵人嘅觀點立場甚至比“中國”嘅粵族人仲要左，仲要強調“和諧愛國”！